Ir abajo para glosario y reglas de grafia (version in English; in Hebrew)
Estos días en ellos munchos sefardíes se están trocando al ortodoxo y el ˁolam está en una arrevoltina preta, es menester de hablar del erudito ḥajám lustrozzo Rebbí Eliyahu Benamozegh (1823-1900); nombrado “Platón de los ĵudiós italianos”. Él nació en Livorno de padres sefardíes oriundos de Fez, de famías validas de maˁala de rebbisím y de mercaderes abastados. El apellido Benamozegh se topa todavía encade ĵudiós de Fez.
Livorno, era una cibdad mesjeada sin hiba de nada ḥatta que el gran Duque de Medici asentó cabesa (exp.), y en 1587 él invitó a los ĵudiós del mediterráneo que vengan pa pozzarsen en la cibdad. Sabiendo bien sabido la faidá que los ĵudiós tienen endonde meten sus manos derechas (exp.), él los dio todos los derechos cibdadanos igual que a los de los sejením. Munchos anusím de España y de Portugal, ĵudiós de Marruecos, de Turquía y de otras kehil.lot sefarditas del mediterráneo se afincaron ahí. La cibdad creció y se enfloreció (exp.), y volvió a ser un centro emportante de la diasporá sefardí. Ansí se haga el mazzal (exp.) por la kehil.lá ĵudía endiamantada que se enfloreció ahí. De esa kehil.la luzzida salió el gran pintor del siglo XIX, Amadeo Modigliani, la famía Montefiore, y más un wuenque deleídos y escribidos. Y daca que plazzas en Livorno están nombradas ‘Piazza Benamozegh’ y ‘Piazza Attías’. Cuazi todo los sidurím y libros reliĝiozzos de toda la diasporá sefardí se estampaban en la cibdad de Livorno ḥatta la segunda guerra mundial!
Ma por mal, el padre se arrancó de la vida (exp.), y Eliyahu Benamozegh chiquitico todavía. Su tío, rebbí Yehudá Coríat, El hermano de su madre, Clara, le rebbeó y le ambezzó. Y vaya por los ambezzamientos y las honduras. Rebbí Eliyahu Benamozegh era un león en todo: *Torá, *Talmud, *Midrash, *Kabbalá, y en muncha sabiduría ĝeneral de las ciencias y de las artes liberales. Durante años, estuvo él ocupado con munchos embebecimientos: rebbí de la kehil.lá de Livorno, profesor de teoloĝía en la academia rebbinicá de la cibdad, Kabbalista, filosofo, ma más que todo, él era un